البداية فرج والنهاية فرح

 

" البداية فرج والنهاية فرح "

للكاتب : محمد فيوري 

تصنيف : كوميدي رومانسي

اللغة : عامية مصريه 

الأجزاء : 3

السن : متاح للجميع 

تاريخ النشر : 12-2-2021

" نحن نهتم أن تتخيل ما تقرأ "

عيادة الطبيب النفسي صوف الكتاني

الثالثه عصراً ..

 

فرج مستلقي علي الشيزلونج في حالة استرخاء تام .. يحكي مأساة حياته للدكتور الكتاني ..

 

قولتلي يا فرج يابني .. انت مابتنمش وسهران ليل نهار بتفكر فيها ... صح ؟.

 

أيوه يا دكتور .. صح .. مابشوفش النوم .. بس مش منها أو بسببها انا حاسس إن حالتي بعيده خالص

عن موضوع حُبي ليها ، انا عندي مشاكل كتير فوق راسي و مش لاقي أي حل .. مافيش أي وحده

بتعبرني ولا بتحبني  و أخرهم بسبوسه اللي بسببها  .... إيه ده يا دكتور . إيه ده !.. عيب كده 

 قشر اللب اللي انت عمال بتقزقزه ملا وشي عيب . انا مريض عندك فالعياده مش في قاعة سينما ..

 

اعذرني يا فرج يابني انا اسف يا حبيبي اسف .. ده مش لب .. دي بذور كتان .. تاخد شويه .

 

***

 

سيارة فرح  - طريق مزدحم

 

الرابعه عصراً ..

 

فرح في قمة النرفزه وهي تقود سيارتها وسط طريق مزدحم  متجهه إلي عيادة الدكتور صوف الكتاني

يرن الهاتف .. تنظر له .. تتنهد بعمق وعصبيه وتوتر .. ثم ترد ..

 

الو .... اقفل يا جزمه قديمه وديني لو شوفتك قدامي هدوس عليك وافرمك واحطك في علب وتبقي

اكل مُعلب للقطط والكلاب . ده حتي القطط والكلاب يقرفوا يكلوك .... مين !.. مين معايا !!.

أيوه يا دكتور كتاني انا أسفه أسفه خالص ، اعذرني انت عارفني مابحبش اسمع صوت أي راجل

حتي لو كان ابويا أو اخويا ... باجي عندك ليه .. علشان نصيبي الأسود إن مافيش غيرك اللي احكيله

مسافة السكه وهكون عند حضرتك .. أنا اسفه جداً إني اتعصبت عليك . في ستين داهيه اقصد مع السلامه.

 

***

 

بيت بسبوسه

غرفة بسبوسه ..

بسبوسه مستلقيه علي السرير هائمه حالمه سارحه تفكر .. تمسك بالهاتف وتتصل بوليد ..

 

الو .. وليد انا اسفه إني كلمتك وازعجتك بس ... بس مش قادره انساك ارجوك اسمعني لمره وحده

انا بتقطع وبتعذب وبتقلي وبتشوي !.. الو ... وليد .. وليد .. الو .. قفل في وشي . الله يسامحه..

 

***

 

الجيم

 

وليد داخل الجيم يمارس تمارينه اليوميه المعتاده ... لكنه هائماً حالماً سارحاً يفكر

يترك التمرين وكل شيء من يده  و يمسك الهاتف ويتصل بتغريد ..

 

الو .. تغريد انا اسف إن كلمتك وازعجتك بس ... بس مش قادر انساكي ارجوكي اسمعيني لمره وحده

انا بترمي فالنار واطلع منها علي تلج واهرب من الاتنين علي !.. الو .. تغريد .. تغريد .. الو ... قفلت

في وشي . الله يسامحها ..

 

***

 

شُغل تغريد

 

تغريد جالسه امام مكتبها هائمه حالمه سارحه تفكر .. تمسك الهاتف وتتصل بعصام ..

الو .. عصام انا اسفه إني كلمتك وازعجتك بس ... بس مش قادره انساك ارجوك اسمعني لمره وحده

انا صُباع رجلي بينمل وقلبي بيوجعني وشعري !.. الو .. عصام .. عصام .. الو .. قفل في وشي .

الله يسامحه ..

***

سيارة عصام

 

عصام يقود سيارته علي الطريق خلف سيارة فرح تماماً .. يمسك الهاتف ويتصل بفرح

الو .. فرح انا اسف إن كلمتك وازعجتك بس ... بس مش قادر انساكي ارجوكي اسمعيني لمره وحده

انا بيجيلي كوابيس واحلام مفزعه وبتشنج زي الأطفال

 

سيارة فرح ..

اسمعني انت يا حيوان انا شيفاك فالمرايا وانت ورايا من ساعة ماطلعت من بيتي . قسماً عظماً لو ما بطلتش

تتصل بيا وماغيرتش طريقك دلوقتي هركن العربيه وانزل  اصوت فالشارع  والم عليك الناس  . اقفل ..

 

الو ... فرح .. فرح .. الو ... قفلت في وشي للمره المليون .. الله يسامحك ..

 

***

عيادة الدكتور صوف الكتاني

 

تدخل فرح غرفة الكشف .. ترمي حقيبة يدها بعيداً بعصبيه ..  تستلقي علي الشيزلونج وهي تتنهد قرفانه

في إنتظار الدكتور الكتاني .. يدخل الدكتور كتاني مبتسماً لفرح وهو مرتدي بالطو صوف ثقيل في عز

الحر ..  يجلس علي الكرسي الخاص به أمام فرح ليسمع منها ..

 

اَنسه فرح .. يا تري عجبك البالطو بتاعي ده صوف خرفان مُطعم بالكتان .. امسكي كده المسي الوبره  ..

 

بقولك إيه .. انا مش ناقصه جنان معاك انت كمان . هاتسمعني ولا اسيبك وامشي ..

 

لاء لاء تمشي إيه انا اسف

بس مش عارف انا مشغل التكيف علي ابرد درجه وحاسس بحر لا يطاق ليه .. الحقيني يا اَنسه فرح

بموت الحقيني بتخنق بتخنق مش قادر اخد نفسي مش قادر ..  يسقط دكتور كتاني علي الأرض

ووجهه أحمر يتصبب عرق بغزاره واضعاً يده علي عُنقه وهو يحاول التنفس بصعوبه شديده يختنق .

 

تنهض فرح من علي الشيزلونج فالحال بقلق

دكتور كتاني .. دكتور كتاني مالك رد عليا .. دكتور . يانهار اسود ومنيل ..

 

***

 

سيارة فرج

 

فرج في قمة سعادته وهو يقود سيارته علي الطريق بعد جلسته الناجحه و المثمره مع الدكتور الكتاني ..

يمسك الهاتف ويتصل بصديقه فارس ..

 

الو .. بقولك إيه يا فارس اسمع اجمل خبر .

 أنا خلاص نسيت بسبوسه و نسيت اللي خلفوها ومش عايزها تاني في حياتي بعد النهارده   

دي معجزه بجد معجزه انا مش مصدق نفسي إزاي أنساها بالسرعه دي

اكيد اكيد هقولك  كل حاجه حصلني علي الكافيه بتعنا فوراً ..

 

***

 

عيادة الدكتور صوف الكتاني

 

أضواء خافته موسيقي هادئه حوض سمك صغير به سمكتين زهرية رقيقه بها وردتين

فرح مستلقيه علي الشيزلونج في قمة الإسترخاء وهي تحكي مشكلتها للدكتور كتاني

الدكتور كتاني جالس امامها علي الكرسي الخاص به مرتدي فنيله داخليه وكرافت وبوكسر فقط

يستمع إليها بكل إهتمام وتركيز و يكتب في الدفتر الصغير كل كلمه وحرف ..

 

انا الأوضه بتعتي يا دكتور بتبُص علي النيل مباشرة ، سور الكورنيش زي ما انت عارف مليان عشاق

وبشوف .. بشوف كل يوم قصة حُب بتنتهي قدام عينيا .. وهو اللي بيكون السبب مش هي .. كل الرجله

بصراحه مايستهلوش ما .. إيه يا دكتور الأرف ده مش هتبطل اللب اللي انت بتكله ده   بيجي علي وشي

 

اعذريني يا بنتي اعذريني .. كملي .. تف ...  كملي ..

 

مهو الأرف اللي انت فيه ده هو اللي بيكرهني فيكم اكتر .. تعرف انا بعد ما بخلص عندك العياده

بروح البيت اخد شاور خمس ساعات بسببك ..

 

لاء لاء ماسمحلكيش .. لعلمك مش كل الرجاله مقرفين .. انا بس .. كملي يا ماما كملي يا حبيبتي ..

 

أبداً من صغري بشوف كل يوم قصة حُب بتنتهي قدام عينيا نهاية مأسويه  وكرهت كل الرجاله من ساعتها

وحصلتلي عقده بقي مش عارفه ولا اتلبست ولا إيه اللي حصلي ..

 

يعني عمرك ما حبيتي قبل كده يا فرح يا بنتي .. تف ..

 

لاء .. ولا عايزه احب ..

 نفسي أعيش في عالم مافيهوش أي راجل ودي امنيتي الوحيده يا دكتور كتاني .. او حتي اطلع أعيش

فوق علي القمر لوحدي و اهو بالمره لا رجاله ولا ستات .

 

طيب قومي امشي اطلعي بره وماتجيش هنا تاني . قومي امشي ..

 

انت بتزعقلي ليه .. هو انت فاكر نفسك إيه إياك تعلي صوتك عليا لحسن وديني ألبسك حوض السمك

الصغير ده فدماغك وماتعرفش تشيله من علي راسك طول عمرك  ..

 

كده يا فرح يابنتي . حرام عليكي انا راجل قد ابوكي مايصحش . تف ..

 

*** 

كافيه

 

فرج في قمة سعادته جالس مع صديقه فارس امام طاوله عليها جميع المشروبات مُحتفلاً ..

 

مش قولتلك يا فرج دكتور صوف كتاني من اكبر دكاترة الطب النفسي والأعصاب في مصر .. صدقتني

صدقت صديقك المُخلص فارس اللي بيخاف عليك وعلي مصلحتك ..

 

صدقتك إيه وكدبتك إيه .. انت فكرني هطير من الفرح بسبب الدكتور الكتاني اللي انت قولتلي روحله ده ..

 

امال طاير من الفرح ليه ياخربيتك .. أنا مش فاهم حاجه ! ..

 

هفهمك ..

انا كنت خارج من العياده ولقيتها جايه في وشي .. انا مشيت وهي دخلت وخدت قلبي معاها .. انا قلبي مش

موجود دلوقتي يا فارس مش موجود ومش معايا .... معاها هي ..

فارس انت وقفت ليه !... رايح فين ! ... فارس ... فارس .. استني يا اخي انا ماكملتش كلامي  ..

 

 

***

 

عيادة الدكتور صوف الكتاني

 

تف .. قولي يافرح يابنتي فضفضيي .. كملي ..

 

خايفه احب .. وهو بيطاردني في كل مكان اروحه .. ده حتي انا لسه مهزقاه وانا جيالك العياده علشان كان

ماشي  ورايا بعربيته وبيطاردني ..

 

ويا تري اسمه إيه .. وبيشتغل إيه .. قولي ماتخفيش يا ماما انا معاكي وسامعك .

 

اسمه عصام .. و تقريباً قالي إنو مدير شركه ... بس لاء لاء مستحيل احبه أو احب أي حد غيره

انا مش جيالك علشان تساعدني إني احب رجاله انا جيالك علشان تخليني اكرههم اكتر وتقولي طريقة

فتاكه و فعاله تذيد كرهي ليهم  واكرهم اكتر واكتر واكتر .. انا بكرهم قوي يا دكتور قوي

 

أنا تحت امرك يا فرح من عيني دي لعيني دي ..

 

متشكره خالص يا دكتور كتاني انت إنسان عظيم  ... ماتجيب شوية بذور كتان من فضلك ..

 

قوي قوي اتفضلي ..... أيوه ... أيوه ... تمام .. قزقزيها زي اللب العادي دي سهاله جداً ..

لاء  ماتفيش البذور علي الأرض .... تفيها علي وشي انا ... أيوه  كده .. شاطره خالص يا فرح  ..

 

***

اليوم التالي

بيت بسبوسه

 

غرفة بسبوسه ..

 

بسبوسه في قمة اناقتها تتزين أمام المراَة وتضع الينسز الزرقاء وجميع مساحيق التجميل المتواجده أمامها

تكُح بشدة هاتموت من كثرة بودرة التجميل المتطايره فالهواء حولها .. عفره ماليه الأوضه ..

تتجه ناحية الشباك سريعاً وتفتحه لتستنشق الهواء النقي ..  يرن الهاتف .. تجري بسرعه وتمسكه وترد

 

الو أيوه يا وليد عارفه إنك هتتصل  .... يادي النيله هو انت . نعم يا فرج نعم عايز مني إيه !...

بجد .. يعني خلاص بجد بجد نسيتني وشلتيني من دماغك ومش هاتوجع دماغ اللي خلفوني تاني ..

متشكره خالص يا فرج متشكره . انت إنسان بديع ووديع زي ورد الربيع .

 لاء أبداً أطمن . انا بكُح علشان عندي شوية برد ... لاء مش كورونا لاء اطمن .

مع السلامه ... مع ألف سلامه يا فرج ..

 تنهي بسبوسه المكالمه وتكمل الكُحه بشده وبراحتها ..

 

 

***

 

عيادة الدكتور صوف الكتاني

 

فرج مستلقي علي الشيزلونج في حالة استرخاء تام ..

 

انا مش فاهم يا فرج يابني اَنسه مين اللي انت بتتكلم عنها ..

 ويعني إيه في يوم و ليله نسيت بسبوسه اللي انت جايلي علشان تتهبب تتعالج بسببها . هو لعب عيال ..

امال الشهادات اللي انا واخدها دي كلها والعياده اللي فاتحها دي اعمل بيها إيه !. أقلبها نساء وتوليد

لا لا يا فرج زعلتني منك بجد .  انا لازم اخليك تنسي بسبوسه بمجهودي وتعبي معاك

 انت مش دكتور نفساني علشان تنساها من نفسك اسمع كلام الكبير يخاف الصغير ..

 

يا دكتور كتاني ارجوك افتكر .. وانا خارج من العياده من عندك هنا إمبارح كانت هي داخله ..

 

انا بعقلي وفاكر كويس وماعنديش حالات غيرك بتجيلي العياده

اه اه افتكرت .. انت تقصد الاَنسه فرح ..

 

هي اسمها فرح !..

 ده اسمها يجنن و كله بهجه وسرور وسعادة  واكيد الخير هايجي علي ايديها إن شاء الله وتحبني ..

 

يا ساتر يارب . خير إيه اللي هايجي علي ايديها يا فرج يابني . انت ماتعرفش حالتها . دي حالتها حرجه جداً

دي بتعاني من حاله ضمن حالات الإكستريم  طربوش مش عند أي حد تاني . ربنا يشفيها ويتولاها برحمته ..

 

إكستريم طربوش !. .. هو إيه الإكستريم طربوش ده يا دكتور ارجوك طمني . هي هتموت ! ..

 

ده نوع من أنواع الإكتفاء بالذات يا فرج يابني ، يعني معتقداتها بتفضل متمسكه بيها ولبساها علي دمغها زي

 الطربوش . بتكره كل الرجاله . وبعدين دي حاجات طبيه مش عايز اتوهك معايا وادخلك في دومات الطب

النفسي لأن احباله شائكه وفائقه ..

 

أيوه يعني هي ممكن تحبني يا دكتور بالطربوش ده ولا مافيش امل .. يا دكتور إرحمني وشي اتهري ابوس

إيدك  ..

 

ماعتقدش يا فرج يابني ماعتقدش . ده شباك الأوضه بتعتها بيُبص علي النيل و بتشوف بعنيها مصايب

الرجاله والورد اللي بيتقطع والقلوب اللي بتتحطم كل شويه .. ابعد عن فرح وخليك في بسبوسه اللي انت

متهبب علي عين أهلك و اللي خلفوك جايلي بسببها . انا بحذرك و قسماً عظماً أقوم أرمي نفسي من الشباك

وعضمي يتكسر مليون حته .. كمل ..احكيلي حكايتك مع بسبوسه انا كلي اذان طاغيه وصاغيه .. تف ..

 

" فلاش باك "

قبل عام من الأن - شتاء

 

العاشره ليلاً ..

فرج يقود سيارته علي طريق صحراوي مُظلم عائداً من عمله  ... يلمح امامه سياره متوقفه علي جانب

الطريق  و فتاة تشاور له بيدها ... فيتوقف بسيارته علي الفور خلف سيارة الفتاة وينزل ويتجه إليها ..

 

خير في إيه يا اَنسه .. عربيتك متعطله ولا حاجه ..

 

أيوه مش عارفه إيه اللي حصل العربيه وقفت مني فجأه .. انا بردانه بردانه قوي جسمي كله متلج .

 

طيب تعالي فحضني

 

إيه قلة الأدب دي امشي مش عايزه مساعده امشي

 

انا اقصد تعالي فالعربيه عندي انا مشغل السُخن .. اتفضلي انتي ادخلي عربيتي وانا هشوف عربيتك

يمكن أحاول اصلحها ..

 

تتوجه بسبوسه إلي سيارة فرج وتفتح الباب وتدخل وتغلقه خلفها ..

يتوجه فرج إلي سيارة بسبوسه ويفتح الباب ويدخل ويغلقه خلفه . لكنه يشعر بإختناق شديد ويكُح بشده

يشعر إنه يموت يحتضر يرفع إصبعه ليتشهد  ... يقفد الوعي فالحال ... لكنه يفيق فالمستشفي ..

 

" إنتهاء الفلاش باك "

 

العوده الي عيادة الدكتور صوف الكتاني 

دي كانت اول مره اشوف بسبوسه فيها يا دكتور ... من ساعتها جالي ربو مزمن بحاول اتعالج منه بالبخاخ ..

لكن .. لحد دلوقتي انا مش متأكد هي حلوه ولا مجرد إنسانه منقوعه في بودرة تجميل زي صدور الفراخ

اللي محطوطه في البقسماط والتوابل .. سنه وانا بحاول اشوفها تاني وجهاً لوجه علشان اتأكد من جمالها

وللأسف هي مش بتديني أي فرصه . وماكنش فيه قدامي غير إني أحاول معاها بالتليفونات و بس ..

دكتور كتاني انت نمت ... دكتور .. يا دكتور ... دكتور كتاني

 

لا لا انا صاحي تف .. كمل كمل يافرج يابني صدور فراخ وإيه تاني . مافيش شوية سلاطه .. 

لاء مافيش يا دكتور

 

طيب كمل انا سامعك وبكتب بس القلم بعيد عني كمل يا فرج كمل يا حبيبي  ..

 

 

" فلاش باك "

ستة شهور قبل الأن

 

الو .. بسبوسه اسمعيني انا بموت مش قادر انساكي  .... مين معايا ...  اختها !.. طيب ممكن اكلم بسبوسه

قوليلها فرج . فرج اللي وجعلك دماغك ... بسبوسه راحت المستشفى !! ... مستشفي إيه . وليه ؟ ..

الو ... الو ...

 

جريت مش شايف قدامي .. كان الوقت ليل .. كنت بطارد وجهها في الأمطار وفي أضواء السيارات

ماكنش فيه وقت للعرافات أبداً ، لأني كنت لازم ادورعليها فالمستشفيات ..

لقيت المستشفى ودخلتها .. كنت ماشي فالممر الطويل اترنح اتخبط من العذاب اتسائل مع نفسي هعيش إزاي

من غيرها ... لقيت مُمرضه جايه في وشي سألتها علي بسبوسه ...  قالتلي دي لسه ماشيه من دقيقتين بالظبط

قولتلها هي كان عندها إيه يا مُمرضه طمنيني ابوس ايديك .. قالتلي كانت بتعمل عملية نفخ وتكبير صدر

 

 وفجأه .. سمعنا صوت إنفجار ضخم بره فالشارع هز جدران المستشفي كلها و كسر الأزاز علينا وغطانا

جريت انا والمُمرضه نبُص من الشباك ... كان اصعب موقف يمر عليا في حياتي واشوفه بعيني ..

ماكونتش شايف بسبوسه من كتر الناس اللي كانوا حوليها بينقذوها ..

 

" إنتهاء الفلاش باك "

 

العوده الي عيادة الدكتور صوف كتاني

بس كده يا فرج يابني ده معناه إن السيليكون مغشوش و مضروب ، انا ماسمحش أبداً  إن ده يحصل في بناتنا

 اللي بيلعبوا في خلقتهم ويعملوا العمليات دي ، انا لازم اتصل فوراً بشركات امهات الأبقار و اشتكلهم ..

 

استني عندك يا دكتور .. مالوش داعي .. بسبوسه خفت . لإن إصابتها ماكنتش فيها هي للأسف

كانت في الناس اللي ماشين جنبها بنفس الوقت .. واحد رجله طارت والتاني دراعه طار

ووحده كانت حطه سيليكون أصلي طار منها هي كمان بسبب بسبوسه.. بسبوسه اللي ماكنتش راضيه تعبرني

وتبُص في خلقتي .. ارجوك يا دكتور ننسي موضوع بسبوسه وخلينا في موضوع  فرح ابوس ايدك يا كتاني .

 

انسي انت يا فرج يابني ..

 انسي إني اخليك تسلم قلبك لوحده تاني . لأن ممكن في أي لحظه حاجه من جسمهم تفرقع في وشك 

 انت قلبك رُهيف مُرهف مُرتهف مرهوف واللي ياما يحب .. ياما يشوف ... تف ..

 

 

***

 

بعد مرور شهور وشهور وشهور

بيت فرح

 

غرفة فرح  ..

فرح مستلقيه علي السرير علي ما يبدو عليها إنها هائمه حالمه سارحه وهي  تتصفح الهاتف وتقراء جميع

رسائل عصام الغراميه مُنذ سنوات حتي اللحظه الحاليه .

 

الرساله الأولي ..

فرح .. كنت اتمني أطول نجوم السما وأجمعهم كلهم مش عارف ليه .. يمكن علشان بحبك أو يمكن علشان

الكلام ده ماحدش بيقوله إلا لما يحب .. فرح انا حاسس إني عايز استفرغ وارجع كل اللي فبطني بسببك

وعلي وشك .. انتي حياتي وقلبي و عمري كله ..

 

تتنهد فرح و تشعر بسعاده عارمه وهي تقرأ كلمات عصام الرومانسيه الأخاذه .

 

الرساله الثانيه ..

فرح .. إياكي تفتكري إني بحبك . لاء بالعكس انا قرفان منك . وقرفي منك هو اللي بيخليني اقربلك كل

شويه واتعلق بيكي اكتر . افهميني ارجوكي انا بموت و بتعذب حسي بيا وبالأرف اللي انا فيه منك وبسببك

 انتي حياتي وقلبي وعمري كله ..

 

تذداد فرح تنهيداً وتشعر بسعاده اكثر واكثر لكلمات عصام الساحره  ..

 

الرساله الألف ..

فرح .. تتصدقي إن انا اتقلبت اربع مرات بالعربيه بتعتي في ترعة المريوطيه بسببك .. لأن كل شويه وانا

سايق اشوف عربيه زي عربيتك وافتكرها انتي واجري اجري اجري وراها وفي الأخر ماتطلعش عربيتك

و اعاتب نفسي وضميري يأنبني علي اللي بعمله فقلبي ، بتكون الترعه قصادي بالصدفه فبتوكل علي الله

وبدوس بنزين واقع انا والعربيه فالترعه علشان عايز اخلص من العذاب .. لكن للأسف الشديد . الناس

بيلحقوني وينقذوني . لحد ما بقيت عامل زي السمكه اللي بتطلع فالروح .. انتي خلتيني سمكه يا فرح سمكه

انتي حياتي وقلبي وعمري كله .

  

لاء لاء انا مش قادره إيه الإنسان ده . إيه كمية الرومانسيه دي ده فظيع . إزاي انا ماكونتش حاسه بيه

انا لازم اتصل بيه واعتذر علي كل اللي انا عملته معاه ، بس يارب مايكونش وقع فالترعه . لما ألحقه

بسرعه  يا رب استرها يا رب ..

 

الو ... عصام .. انا بحبك بحبك يا عصام .... عصام انت سامعني .. إيه صوت المايه ده !..

يانهار اسود .. ماتتحركش من مكانك خليك زي ما انت . انا جيالك حالاً ماتخليش حد يساعدك ولا ينقذك ..

 

***

 

بيت فرج

 

غرفة فرج ..

 

فرج مُنذ شهور وشهور لا يأكل لا يشرب لا ينام .. جالساً امام شاشة الابتوب يبحث ويبحث ويبحث

ويقرأ الكثير من مواضيع مُختلفه عن حالات الإكستريم طربوش .. وبالفعل تعلم الكثير لأن حالة فرح

تُعتبر الحياة والموت بالنسبة له فهي حبه الأخير الذي لم يبدأ بعد .... يرن الهاتف .. ينظر إليه ...

يرد ..

 

وجدتها وجدتها يافرج يابني سيب كل اللي فأيدك وتعلالي العياده فوراً فوراً يا فرج بسرعه مافيش وقت

الموضوع لا يتحمل كل العذاب اللي انا سيبك تتعذبه .. تف ..

 

حاضر حاضر يا دكتور كتاني مسافة السكه وهكون عندك .

 

***

 

عيادة الدكتور صوف الكتاني

 

إيه يا فرج يابني خير دقنك طويله بالشكل ده ليه انا مش مصدق !.

دي وصله لحد باب العياده بره . دي لسه مادخلتش معاك حرام عليك يابني خير أعوذ بالله

 

أبداً يا دكتور كتاني .. انا مطولها علشان الأرف اللي انت بتفه علي وشي كل شويه ... إيه ده هو انت

غيرت اللب بتاعك ولا إيه ..

 

أيوه غيرته لأن بذور الكتان بتحرق صدري غيرتها لبذور برتقان . صحيه  .. تاخد شويه .. تف ..

 

اووووه يا دكتور كفايا كفايا ابوس ايدك اتوسل إليك ..

 

طب اقعد اقعد علشان افهمك الموضوع . انت خلاص هتكون اسعد شاب فمصر والدنيا كلها يا فرج ..

أولاً انت كنت بتحب بسبوسه اللي مطلعه عينك .. وانا بتفحصي وتمحصي وأبحاثي المُميته اكتشفت حاجه

غريبه جداً جداً   لدرجة إنها جرحت كبريائي وكرامتي لما أصابتني في عنفواني و تفكيري .

اكتشفت إن بسبوسه بتحب واحد اسمه وليد ووليد بيحب وحده اسمها تغريد وتغريد بتحب واحد اسمه عصام

وعصام بيحب فرح وفرح مابتحبش حد ..

 

مش فاهم حاجه يا دكتور إيه شغل المجانين ده . فهمني وحده وحده من فضلك ..

 

بكل إختصار البدايه فرج اللي هو انت .. مش لاقي وحده تحبك ولا وحده تعبرك

والنهايه فرح .. اللي مش عايزه تحب حد ولا عايزه تعبر حد .

 

برضو مش فاهم ابوس ايدك فهمني لحسن اولع في دقني اللي مش عجباك واحرقلك العياده

 بالولاعه دي ..

 

انت مش بقيت تحب فرح وبتحلم بيها وهي اللي شاغله كل تفكيرك دلوقتي .. يبقي لازم نوسع الطريق

لازم وليد يحب بسبوسه ولازم عصام يحب تغريد وتبقي كده الدنيا فضيت ليك انت و فرح يا فرج يابني ..

 

امسك امسك بوكيه الورد ده واجري علي بيتها بسرعه قدمهولها مافيش وقت وانا هتصرف في موضوع

الأحباء التانين و أوفقهم علي بعض اجري روح بسرعه اجري بسرعه  ...  براحه حاسب حاسب يا فرج ..

يسمع الدكتور كتاني صوت دربكه شديده علي السلالم الخارجيه للعياده

يا اخي لسه كنت هقولك حاسب تتكعبل في دقنك الطويله  انتوا متسرعين ليه عايز افهم 

ربنا يسترها معاكم يا ولادي . ربنا يسترها معاكم ..

 

 

***

 

الشارع امام عمارة فرح

 

تصل سيارة فرح وتقف بجانب الرصيف .. تليها سيارة فرج في نفس التوقيت وتقف خلفها ..

تنزل فرح وينزل معها من الباب الأخر عصام .. ينزل فرج من سيارته وهو حاملاً في يده بوكيه الورد

تبدأ دموعه تنهمر علي خديه من هول المنظر مع تطاير ذقنه الطويله من نسمة الهواء  ..

 

واقف ليه !.. امشي معايا يا عصام علشان اعرفك علي اهلي واقولهم قد إيه انت كنت بتضحي علشاني ..

 

مايصحش يا فرح اطلع معاكي وانا متبهدل كده هدومي كلها متغرقه .. انا كنت فكرك هتوصليني بيتي

علشان مش معايا عربيتي اللي غرقت  ..

 

لاء يصح . اهلي مش هيصدقوا إنك كنت بتضحي علشاني غير وانت متبهدل ومعفن كده . يلا بقي ..

هات ايدك ماتتكسفش  .. يلا ..

 

***

 

بيت بسبوسه

 

غرفة بسبوسه ..

كُحه شديده .. مع عفره وضباب بكل أرجاء الغرفه .... بسبوسه امام المراَة  .. يرن الهاتف ... تجري

مسرعه فالحال وهي تبحث علي الهاتف في كل مكان معميه مش شايفه .. تجده تحت السرير .. تمسك به

تنفخ البودرة من علي الهاتف وهي تكُح بشده ... ترد ..

 

أيوه يا وليد انا كنت عارفه إنك هتتصل ...

 يا دي النيله انت إيه يا اخي مش هتبطل الجنان اللي انت فيه ده ... يعني إيه انت تحت البيت ومحتاج

تتكلم معايا ... حاجة إيه اللي جايبهالي !.  جايبلي إيه انت يعني ..

يا ربي انت هتجنني ... طيب حاضر استناني انا نازله لما اشوف اخرتها معاك إيه ..

 

***

 

الشارع امام عمارة بسبوسه

 

تخرج بسبوسه من مدخل العماره .. تتجه ناحية سيارة فرج  تفتح الباب وتدخل وتجلس بجواره ..

 

خير في إيه ... يانهار اسود !.  هي دقنك اللي خارجه من شباك العربيه دي وبترفرف  فالهوا بره  ..

 

بسبوسه انا محتاجك تسمعيني كويس ارجوكي اسمعيني ... انا عمري ما جيبتلك هديه ولا فكرت اجيبلك هديه

وبوكيه الورد ده كنت جايبه لوحده اسمها فرح . لكن للأسف ماليش نصيب مع حد .. خُدي الورد ده كله

 اعتبريه مش هديه مني ليكي . انا مستخسر ارميه بصراحه  .... إيه ده انتي . انتي بتعيطي يا بسبوسه ..

 

أيوه يا فرج بعيط علشان ماكونتش اعرف إنك إنسان طيب قوي كده وانا كنت معذباك ومطلعه عينك معايا

طيب خُدي امسكي دقني امسحي دموعك فيها ..... امسكي ماتخفيش ..

 

تأخذ بسبوسه ذقن فرج بيدها وتمسح دموعها وهي تبكي منهاره . وتنف بشده ايضاً ..

 

ياااه .. ياااه يا فرج .. انت إيه يا اخي انت إيه قولي . ملاك ماشي علي الأرض انا مش مصدقه  ..

 فرج . انا بحبك بحبك يا فرج  واسفه علي اللي عملته معاك بجد اسفه ..

 

و انا مكنتش اعرف إنك بشعه بالمنظر ده وشكلك وحش قوي كده  انا بجد خايف ومرعوب منك انزلي

انزلي يا بسبوسه وماشوفش وشك تاني .. انا عرفت دلوقتي انتي كنتي بتكُحي كتير ليه لما كنت بكلمك 

انزلي مش قادر ابُصلك و صدري هيتخنق من اللي انتي حطاه علي وشك ده  .... ماتنزلي ...

استني عندك استني براحه براحه .... افتحي الباب تاني يا جزمه قديمه قفلتي علي دقني 

 

***

 

عيادة الدكتور صوف الكتاني

 

يدخل فرج عيادة الدكتور كتاني وهو في قمة الحُزن سارحاً مهموماً مكسوراً  فاشلاً مُتفتفتاً مُتحطماً ..

تدخل ورائه مُتسحبه ذقنه الطويله المليئة بأوراق الورود المُقطعه والمرميه في وجهه بألوانها المُختلفه ..

 

خير يا فرج يابني ... دقنك مليانه ورد ليه مش وقت حصاد الورد خالص دلوقتي .. قول طمني !.

اوعي ... اوعي تكون فرح قطعت بوكيه الورد ورمته في وشك ... دي تبقي إنتكاسه وجتلك يا فرج

إنتكاسه و جتلنا كلنا يا فرج  و الإكستريم طربوش لسه علي راس فرح ومش راضيه تقلعه وتستسلم أبداً

 طمني يابني .... ساكت ليه .. انطق أتكلم إنفجر إنفعل ..

 

يجلس فرج بهدوء حزيناً مهموماً ناظراً برأسه إلي الأرض .

دي مش فرح يا دكتور كتاني اللي رمت الورد علي وشي

 دي بسبوسه هي اللي قطعته و رمته علي وشي ..

 

بسبوسه !! .. وانت اتهببت روحت عند بسبوسه ليه . اتهببت روحت ليه . انا قايلك روح لفرح ..

 يابني انا عمري بدل مايقصر هيطول منك انت وبسببك . انطق روحتلها ليه ! ..

 

ينفعل فرج بشده

اسمع يا دكتور .. انا خلاص مش عايز احب حد ولا حد يحبني انا هبات ظالم ولا ابات مظلوم

انا ماخدتش من الدنيا والبنات غير حرقة الدم وتعب القلب وتربية الدقن . ماخدتش أي حاجه

انا بقيت شكل الشحاتين .. بمسح الأرصفه بدقني الطويله والناس بتفتكرني كناس ويدوني فلوس

انا بقيت غني يا دكتور بقيت غني ومعايا فلوس كتير بسبب دقني ولحد دلوقتي مش لاقي اللي احبها وتحبني

ملعون أبو الحُب  ملعون أبو الحُب واللي عايز يحب  ..

 

اهدأ اهدأ بس يابني  ووحد الله ..

 تعالي نام علي الشيزلونج تعالي .... أيوه كده .. وسع دقنك خليها مُنسدله علي الأرض خليها مُنسدله

تمام .. تمام .. نام واسترخي خالص اهدأ  وانسي الدنيا واللي فيها واسمعني كويس .

تتصدق انا كنت عارف إن كل ده هيحصلك .. وعلشان كده انا عاملك اغنيه بأيدي ليك مخصوص

لسه مخلصها النهارده الصبح  .. تف ..

 

يوووه  يا دكتور ابوس ايدك مايبقاش ورد وقشر لب علي وشي تيجي إزاي دي ... اغنية إيه اللي عملهالي

بأيدك مخصوص . هي طبخه ولا اكله ! ..

 

قصدي يابني مألفهالك مخصوص ... استني اجيب السماعات الكبيره وحوض السمك الصغير والوردتين

ونسمعها مع بعض ...

 

لاء لاء يا دكتور انا هامشي ومش عايز اجيلك تاني .. ومنه لله اللي كان السبب إذا كان انت ولا بسبوسه

ولا فرح .

 

استني عندك اسمع مني بس ... اهي السماعات اهي ... استرخي يا واد بلاش تتعب قلبي معاك .. تف ..

اسمع بقي الأغنيه وركز كويس معايا .

لسماع ومشاهدة اغنية الدكتور صوف الكتاني لمحمود العسيلي الرجاء الضغط علي العلامة الخضراء

كل عام وأنتم بخير عيد حُب سعيد . محمد فيوري .  MP4